Zien name gonder waorschienlik nie vele kennen, maor os wu zien lapname gaon schrieven zienk biena zeker dajjunder hem gaon kennen : “ Col en Manchet” of nog, biezoender bie doede oostendenaoren “ den Ollegatscheirder”.

Peis maor ukki : un noggol grote vint die altied keirjerechte liep, twas juuste gelik dassu un bustelstok op zien rik geplakt aan. Jaat altied un wit gesteven hemde an.mit un hoge kol en uutstekende manchetten, un doenkere broek altied in u schoone plooj, un korte veste die nogal spande rond zien buuk. En tschonste van ol da hoetje o zien kop, un hoetje dajje in gin ienkele wienkel kon vienden.
Da was nu ukki un beeld van uzen Col en Manchet, een oedere vint, u bitje simpel va geist, die dikwils antwoorde in un gebroken, onverstaonbaar frans.

Voe den eirste orlooge wastun biena normaol en kwaffeur mit un eigen zake. Ju was ie getrouwd en jaat drie kienders, mo os zu wuuf hem verlaoten ad, kort nao dorlooge was tgedaon mit hem. Twas hum ol te veele en tgoeng bergof mit hem, je begon ie raore te doen en gieng weunen op de vindiktivekaoije, waor dattun un apartementje ad . De voorplekke was un kwaffeurszake mit ein scheer stoel in.Die plekke was of gedekt van zien weunplatse mit u gordienne. Jat ie nie veele klanten.
Op u dag kwam er toch een mens vanuut de buuten bie hem binnen om hem te scheiren. Je mogt ie in den einige stoel zitten en August pakte zien scheirmes vast en vroeg aan da vintje wat datten in zien hand had . Tvintje verschoot en zei: “ wel ein scheirs”, waorop da August zei “ Nei, joeng, je leven”, en verder ging met zien werk. Tvintje zaat daor de geile tied mit de poepers

Ken junder gezeid datten veel te vienden was op den diek, waor datten gieng zitten op ein van de banken achter datten de bank schoone ad gemakt mit un witte zakneusdoek.?Jangde ton zien jasje aan de reilinge en gieng dan keirsjerechte zitten op de bank.
Intusschen was ten verheuzen no thozzegras op un kamertje van de twidde verdieping van een huus waor meisjes van plezier under werk deden. Die meisjes adden dikkels veel leute mi Munheire August , mo zu waoren niet benouwd om hem un farce te lappen. Op. u keir, uuzze vriend lag ol lange te slapen, geklid mi un lang nachtkleid, kwamter ein van die meisje geil bloot zien kamer binnen en riep dasse zie den hellige maagd was. August schrikte geweldig, stepte uut zien bedde en liep de straote op roepend datten ioe Oenze lieve vrouwe gezien had;

Zo nu wit je giender ook wie datter Col en Manchet was