beluister hier dit verhaal. 

Ja, vandage een schoon avloptje in me busse: van de pliesjes, osk zo rap meugluk zoe wiln betaaln: 25 euros want kadden ier een moand of twèè geleen gin tiekitje betaald voe te parkeern...

Normaal gin problèèm, iederèèn geliek voe de wet, en anders moe je mor me je vielo no stad kommen, of je pakt de bus of tram. Mor, die bewusten dag woarenk al met stief vele moeite an een pleksje gerocht, twoaren der zelfs een stik of drieje die al under middelvienger uutgestoken adden omdak under pleksje ofgepakt adden. Ken under met evenvele diplomasjie gezeid danze me kl... kosten kussen. Afin, kstoan der en ke bluuvn der stoan. Mor, kzetn men èèste voet uut den otoo, en flak in een verrekte oendestroend. Twas gelik of datter èèn van die drieje van doarjuuste een rechtstreekse tillefingliene aad met uuze lieven èère, en dat den deze dor in de gauwte den èèn of andere saint bernard een kaksje ad loaten leggen... Nu moeje weetn dak gin echte diereliefhebber zien. Ken nietent tegen bèèsten, mor ze moetn redelijk deurbakken zien, der mag gin oar of pluumn mèèr anangen, en 't liefst op een beddetje van groensels, verstojje me? Uutendelijk kan die bèèste dor ook nie andoen, en moe da boasje beter manieren en.

Afin, ken me sjoes ofgevaags an 't gas opzieds van de pier en pol kerke, en ton nog een kèèr weg en were over de tapieten in de kapellestroate ('t was een weke of drieje voor kestdag, en all de tapieten woaren nog redelijk proper, toe dank ik gepasseerd zien...). Doardeure addenk dus gin parkeertiket gepakt, mor kmoesten eigenlijk nie lange in stad zien. Een kadootje voe een moat ze verjoardag, da was aal. Nu kommen kik in die wienkel en, miljaarde, me bank koarte zit nie in me veste!!! Lichte paniek vanzeneigens, voe nie te zeggen serjeuze paniek. Nog een vloeksje, me latste geld uut me zakken, en in de vlucht were nor men oto.

't èèste dak zien, is da tiket achter me ruutewasjer. Azoo te zien was die flik ook nie neffest dien oend ze kadootje gelopen, mor das was op da moment voe mien gin troost. Ken da tiket sebiet in den èèste de beste vuulbak gesmeten (nie op de groend, want kzien wel voe 't miljeu ee!), in men oto gesproengen, en sebiet nor uus. Voe twèè meter, want men oto dee roare. Nie moeilijk, kadden dedjuu twèè platte banden!!! Een gat van een meter ingestekt en je mag drie kèèrs roaden van wien da da zoe kunnen zien. Nog mèèr gegodver en gemiljaar mor kstoenden doar wel ee. AA TEE BEE de bandenmarsjang (een bitje riklame mag ee) was ook ketent, mor twèè euren loater wast aal in orde...Nu echt nor uus en doar voendenk me bankkoarte in men andere veste, mor da was mor een klèèn doeksje op de woende dus. Da tiket woarenk oendertusjen al vergeetn, toet vandage.

Ken een menuutje gepeist voe hèèl me verhaal op te schrieven en tope met die rekenienge were te zenden nor de flieken, mor da gieng nie vele uutalen. Doarom dank et ier op de saait zetten, in d'ope datter nog menschen zien die 't zelfste tegengekommen zien (eigenlijk nie schone van mien ee) en danze ook under verhaaltje schrieven. Met dank an aal de pliesjes, aal de oenden en under boasjes, en an die smèèrlap die me banden kapotgestekt et. Tis topen datten der lange mag van genieten. Wan kzien nu ook nog de slichsten nie ee. Juuste of nie.