Afdrukken
Categorie: Uncategorised
Hits: 8282
Os ju die titel leest peinsde gie zeker dank gedronken hen of dank nu stroendzat achter mun compjoeter zitten, nain, zeker nie, kiekt do mo ukki verder.
Tbegost allemoale onk ikku twee menschen hoorden zèèveren over kongonutjes, die twèè kwamen nie overhain woar, voor den orlooge de beste te vienden woaren. Ik hen ton un artiekeltje geschreven in hut Abé-In,; artiekeltje dank nuu in tostends weergeven.


Den eirsten zei dat de beste kongonutjes te vienden waoren in un kaffé langs de boelvard en den anderen zei dat je daorvoren op de mart moste zien. Ik zei tegen under dat de beste te vienden waren in een kaffeetje in de Bonenstraote.

Uutendelik enk ik toch geliek gekregen, want de beste kongonutjes waoren te vienden in een klain kaffeetje, met een echtn oostendsche name “ De gepekelde fiege”.De baos was kromme Leon Claeys, broer van de gekende coiffeur Eugène, die in de sinte paulusstraote woonde.


Leon aad un gebrek an zien rechterbèèn, die op un soorte van krukke rustte, twas doarom da iederein hem Kromme Leon. noemde. Ie was oltied in zijn kaffeejje te vienden, kaffeetje dat maor u schorte groot was. Zien huus stoend in de Bonenstraote, ad nuumeero 2, mo was niet op den oek van de Siesje Fashoonestraote. Du ziegevel van zien huus was den achterkant van de vissemart en an zien ziegevel hoeng een Oenzevrouwebeeltje woar da veele visschervrouwen kwamen bidden.


Buneen waoren de kelderkeukens, op tgelieksvloers was du kaffee en ton aje nog de massardes.. Deur de klèène gang kwam je in tkaffeeetje waor dat urmo twi tavels stoenden, mi lienks in den oek un mande gevuld mi congonutjes. Rechts stoend un klèène toog en op de groend stoenden spuugbakken gevuld mi zand.

Special de zaoterdag en de zundag en was er veel volk, joenge gasten die goengen dansen in tkeuntje en bij Leon u glas bier droenken en daarbie nutjes aaten.Tsmakte under altied goed, wa n t twaoren de beste in stad.

Leon gieng biena nooit weg en zien grotste pluzier was te babbelen mit die joenge gasten. Hij stierf in oktrober 1955.