Osju vroeger uut du stoasje kam wast tairste dajje zag die schoone torretjes van da ainig schoon gebouwtje stoande op toekje van de Zuudstroate en de Vindictioevekoaije , twoaren gelik van die mienaretjes.
Twas doar dat du diensten van tzaiwezen, tzaikommiesarjoat en de zaivoartschoole woaren oendergebrocht.

 


Da gebouwtje was opgetrokken in de wienter van 1898/99  deur du gebroers Demeyer uut Gent en twerd un juwailtje in zien soorte. Du plangs woaren getaikend deur dun arsjietekt Sjarrel Dewulf die doarmee u spicioale opstellienge gemakt had. ’t Werd tonne ook anzien os u model, un voorbeeld van du Vlamse Runnaissanse, un stiel uut hut begun van de zestiende aiwu.

{mosimage}
Op tgeliekvloers woaren de buurroos van tloodwezen en du dienst van de zaivisscherie en je most doar binnen langs du deuru dichtst bie de Visscherskoaije gelegen. Op diezelfste stoage woaren ook du buurroos van tzaikommiessarjoat, mo om doar tu kommen most ju binnen op dun oek van de Zuudstroate. Die deure most ju ook gebruuken ojje no de zaivoartschoole wilde goan, mo ton mostu ju du trappen op no daiste verdiepienge. Doar haaje aist tsekrutoarjoat, du buuroo van dun dierekteur en de zoalen woar daanzu du lessen gaven. Dun aisten torre diende os uutkiekpost voe du toekomstiege zaioffiecieren en voe opmeetiengen te doen mi du sekstant en du oktant ( twi toestellen om du platse op zai te bepoalen)
Du laste lesgevers van die schoole woaren  : dierekteur Lose, die vroeger kapting was op de moale en loater nor Antwerpen is vertrokken -- munhaire Dedeken, un oede lesgever van dalberschoole – Munhaire dun avokoat Porta die rechtswetenschappen anleirde – Karel Jonckheere, lairoare nederlands en du sekrutaries Vanhove.
Binst dorlooge werd da gebouwtje verschillende kairen buschadigd en achter dorlooge gedailteluk vermakt. De buurroos en zoalen werden nie mi gebruukt en ‘tgebouw zwoar vurwoarloosd. Loater hen zu da u bitje gelapt en getapt en mochten du zaiskoets doar vurgoaren en spelen toe dat tegevoarluk was en die joenges weggoengen. Nu stoat doar un modern gebouw mo bielange niez mi zoe schoone zoda wiender tzaikommiessarjoat nie kunnen vergeten.
Tschonste gebouwtje van uuze stad he platse gemakt voe un blokdooze.


                                                                       Maurice  Ferier
                         
 {fcomment lang=nl_NL}